[娛樂] 亞視女主播 抗命穿黑衣 老細要轉色

老細要轉色　女主播懶理( 2011-09-13 )
抗命穿黑衣　亞視女主播係得嘅


[轉載/Youtube] 亞視大老闆王征日前以半鹹淡廣東話高叫：「亞視新聞部仲係得嘅」，原來絕對唔係講笑。話說喺噚日呢個人月兩團圓時候，新聞部嘅中層似乎都想新聞部同管理層破鏡重圓，所以就好言相勸，叫近期清一色以黑衫出鏡嘅一眾主播，唔着黑、白衫出鏡得唔得？結果毋須多講，六點鐘新聞報道嘅女主播堅持黑衫亮相，證明亞視新聞部真係好得。

新官笑住口落命令
亞視新聞部受到高層干預，誤播「老江西去」消息，最終竟然要兩位新聞部主管揹鑊辭職，亞視新聞部近期士氣真係跌至谷底，但輸人唔可以輸陣，除咗發過聲明抗議老闆插手干預，主播以至記者近日一律以黑衫行動做無聲抗議。
記者噚日着黑衫真係大條道理，因為記協呼籲同行着黑衣抗議當局打壓新聞自由。點知啱啱升職統籌亞視新聞部嘅伍健強突然喺噚日呢個黑衣日叫主播唔好着黑衫，喺開會期間笑笑口問：「大家可唔可以讓一讓，着素色一啲，唔一定要全黑、全白嘅。」
雖然今次唔似上頭落柯打，但喺新聞部同管理層「打仗」期間，主播同記者又點會咁易妥協？最終陳興昌同宋紫皓報道六點鐘新聞時，一個灰色西裝搭灰呔，一個就着黑色上衣，透過行動同老細講句：「編輯自主冇得讓﹗」

王征要做CEO人人怕
其實王征日前出席亞視公開活動時，新聞部四個員工都係黑衫示人；到同王征大合照時，三個女記者更加冇咗影，證明亞視新聞部同管理層關係有待改善。有知情人士同八方講，伍健強今次開口要求主播「轉色」未必受壓，可能係佢新官上任，希望新聞部「河蟹啲」，以求打破僵局攞啲政績。
日前大大聲話要「應聘亞視一個高級職位」同員工搶飯碗嘅大老闆王征，聽聞佢要「應徵」嘅職位正正就係亞視CEO。呢個職位操縱全台生殺大權，唔少員工聽到呢個消息之後心都寒埋，皆因呢位仁兄做股東都搞到亞洲電視雞飛狗走，如果名正言順坐正CEO，後果可想而知。