父母家中註冊 陸永娶妻趕上床
[轉載/Youtube] 組合農夫成員之一陸永同年僅22歲任職地產經紀嘅靚女友Rainah，噚日奉子成婚，佢哋選擇用最簡單嘅方式行禮註冊完成人生大事。陸永噚日帶埋老婆以及外父外母，仲有老婆嘅細佬返到父母屋企，請咗位鬼馬律師主持註冊儀式，雖然一切從簡，但陸永同老婆都有向長輩斟茶，老爺奶奶亦有向新抱仔送上金器，場面好溫馨。遇鬼馬律師搞笑
究竟陸永同老婆有冇感動到喊？佢話冇，陸永解釋：「因為個律師好搞笑，我哋全部人都係casual wear，反而個律師打晒呔最隆重，不過佢見到我哋嘅打扮後話要尊重我哋，即時除咗條呔。」律師仲做埋咕哩，幫手搬屋企嘅傢俬以便行禮。陸永話宣誓時同老婆都冇講錯嘢或者忍唔到笑，過程好順利。
29歲做咗人老公嘅感覺點呢？陸永話冇乜大感覺，不過老婆有啲唔習慣，佢話：「老婆家要叫老爺奶奶有啲唔習慣。」至於老婆俾人叫做陸太慣唔慣？佢踢爆老婆話不知幾開心。註冊完後一家人食飯，陸永話等BB出世搞百日宴先同朋友一次過慶祝。佢仲話前晚喺廣州做嘢搞到好夜，佢話：「搞掂晒第一時間係瞓覺先，真係好攰。」
0 comments:
Post a Comment