棟篤笑第五彈驚嚇登場 林海峰:最驚觀眾無反應
[轉載/Youtube] 林海峰（Jan）開TalkShow其實已是信心保證，觀眾搶飛亦是指定動作，所以10月17-20日舉行的《是但噏我好驚》只進行優先訂票已因反應太好而確定由四場加至六場，明日將會正式公開售票，不想飲恨的讀者們記得一早去買飛。不過，這個阿Jan的第五次卻令他有點驚，驚內容不夠好之餘亦「好驚觀眾無反應。」不會吧!林海峰每次開TalkShow也有其主題，《求其大合唱》後又有講婚禮的《我願意》，今次開Show撞正萬聖節，Jan亦順勢以此作為今次Show的主題。
林：「咁10月咪試下整個萬聖party囉，但其實內容又唔太關事，只想在紅館開一個大party，所以會加插一個末日派對環節叫『是但扮，求其驚』，觀眾可以約埋三五知己一齊扮鬼扮馬，有機會上台同我一齊玩，因為想觀眾入場可以癲番晚，搞呢個Party係想畀理由大家去放縱一下，放工之後有機會去變身，輕鬆，不過，識得睇我人年紀應該有番咁上下，郁動範圍好細，今次就可以畀個理由大家一齊郁下，其實真係好驚觀眾無反應。」
唱歌加跳舞驚退飛
雖然林海峰講得又演得，但他明言今次只會齋講，不過仍然會安排FullBand上陣。
林：「載歌載舞?我驚觀眾退飛喎，其實上次做，今次唔會，我唔會話特登為個Show加乜，諗內容先，內容最緊要。你知我每日都要做節目，日日都要發掘新鮮，所以每日都要儲題目，留番好材料放Show度。不過若然下次再有機會做，我希望回歸伊館，場地細可以拉近同觀眾距離，互動性可以更多。」
未開Show先擔心
第5度開TalkShow，林海峰坦言籌備過程一次比一次困難，皆因觀眾對他的要求較以往更高，不過最令他擔心的反而是傳媒的好心做壞事。
林：「其實優先訂票第一日個股市開始跌，刻我都驚一驚，究竟仲有幾多人會留意訂飛呢件事？好彩，反應都幾好。不過講到最驚，一定係第一場Show後報紙同周刊都會替我個Show整一個文字版，所以買唔到飛觀眾唔使驚，好快有文字版畀你睇。」
創作如下廚
瓣數多多的林海峰自言記性開始差，創作的習性亦跟以往有些不同。
林：「創作有時會有一Team人，有時只有自己，記性開始差，所以一有Idea就要寫低，而家度橋就好似廚師買咁，今日菠菜靚就係菠菜，到煮陣就睇當日買咩靚材料，整咩食就去整，我創作習性開始變咁樣，有朋友父親做廚師，佢都係打開雪櫃見到有咩先諗整乜，係另一類廚師風格，見到咩炒咩，各師各法啦，所以意念點，講唔埋，有時有好多，有時得好少，照煮啦，好睇廚師本身修為。」Paco林海峰
黃柏高
0 comments:
Post a Comment