煲呔險仆街
[轉載/Youtube] 立法會新大樓剛剛啟用，噚日第一次喺新宴會廳請食飯，招呼特首煲呔、行會成員同高官午宴，算係非正式嘅入伙酒，食飯之前，煲呔參觀新大樓，上星期喺會議廳內「發圍」鬧人黑社會、爛仔嘅煲呔，噚日喺立法會內跣腳，幾乎仆街。曾鈺成扶都扶唔切
立法會主席曾鈺成陪煲呔參觀，睇完公眾席等設施，一行人離開，煲呔卻忽然差錯腳幾乎仆街，跟喺佢後面嘅曾鈺成扶都扶唔切，幸好有驚無險，真係一額汗。面對粟米斑腩飯都要入醫院檢查兼拉人上法庭嘅煲呔，噚日好彩冇跌倒，如果佢真係仆街，八方擔心立法會好多人要人頭落地問責。
雖然差啲出事，不過煲呔仍然話新大樓好過舊大樓，而曾鈺成就送咗本兒童畫冊《我要做議員》畀煲呔留念，煲呔想做嘅，唔係呢樣喎，送畀佢都冇興趣睇啦。
遊花園後開飯，新大樓入伙酒舊口味，都係鴻星主理，曾鈺成係主人家，但坦言為咗唔想破壞氣氛，所以唔講嘢，快啲開席更好。梗係啦，佢近日講多錯多，隨時有人掟雞蛋、番茄「加餸」點收科！同舊大樓比較，新大樓宴會廳樓底高好多，又有開揚落地大玻璃，似高級酒店ballroom，可惜冇晒舊時種典雅氣氛。八方唔係盲目懷舊或有殖民地情意結，只係覺得喺度食飯，似公事公辦，坐喺煲呔旁邊嘅公民黨余若薇，就當正係答問大會咁，追問煲呔幾時落實新嘅空氣質素指標，煲呔唔知講真定hea佢，話有決心任內做到，不過余若薇問環境局局長邱騰華時，局長卻唔認數。
「平反六四」Tee合照
飯後餘興係議員、特首大合照，幾個「準工黨」議員李卓人、何秀蘭同梁耀忠，特別着上「平反六四」T恤上鏡，何秀蘭話今次可能係煲呔唯一一張喺新大樓嘅合照，佢哋希望照片可以放喺大樓當眼處，作為歷史紀錄。阿人話食飯前問煲呔要唔要件「平反六四」Tee，煲呔話唔要，瞬即彈開。
新立會入伙酒菜單
三小碟：木魚茄子、脆皮燒肉、京式素鵝
生拆石頭魚羮
蟹粉炸蝦丸伴西蘭花
紅糟藕片炒牛柳粒
頭抽太爺雞
招牌炒飯
蓮子紅豆沙湯圓
合時鮮果
0 comments:
Post a Comment