國泰江若琳姚嘉妮拒絕空中情緣
[轉載/Youtube] 搭飛機時間漫長，最開心莫過於有美女空姐服侍。如果想透過搭飛機識番個空姐女友，八方勸大家唔使諗。國泰航空兩位美女空姐Grace同Phoebe話多數空姐都會拒絕「空中結緣」，總之客人卡片照收，「攞電話」就真係免問。「我係Grace，國泰航空嘅機艙服務員」。最新一輯國泰電視廣告中嘅「滑雪空姐」許芷欣，唔少人都話佢貌似「大眼妹」江若琳。八方上周獲國泰邀請，飛咗轉日本，體驗吓阿Grace嘅空姐生活。
做空姐近四年嘅Grace話，通常向佢「示好」嘅乘客，都會喺高空3萬呎「派片」畀佢，Grace都會禮貌接受，但頂多都係留番個電郵畀對方，「其實我係唔多check email，我嘅底線係唔會畀電話（號碼）。」佢話，以前飛機上娛樂無咁多，所以焦點會落晒喺空姐身上，但家吓人人座位上都有互動電視，唔會再咁迷戀空姐。同Grace一起入職嘅「國泰姚嘉妮」Phoebe王婕菲都話都會收到「示好卡片」，但係佢都一樣都唔會畀電話。兩位美女空姐已名花有主，各位男士可以死咗條心。
機師鍾意新加坡女仔
做咗廿年、已升做高級機艙事務長嘅Carine就話，佢「做女」時，都試過有人「派片」畀佢，後面仲會好sweet咁寫咗首情歌。咁多年嚟，佢只係見過5宗空姐與乘客結緣嘅「成功個案」。至於電視劇《衝上雲霄》中嘅「機師與空姐」，咁多年只係見過一對拉埋天窗。八方聽聞，唔少機師最鍾意運動型嘅新加坡妹，即係港人口中嘅「鬼妹仔」。
若有客人「毛手毛腳」，空姐一樣應對有方。聽講一旦機上乘客行為越軌，無論係飲醉鬧事或者係非禮，空姐都可以自行發出口頭警告，若再犯則會遭書面警告，若三犯嘅話，機組人員一落地就會報警處理。
0 comments:
Post a Comment