[時事] 恒指失守萬七關 市跌瘋了股民輸到麻木了

股民寧過大海　唔肯撈底( 2011-10-04 )
沽軍作戰　一鼓作氣破萬七　　市跌瘋了　股民輸到麻木了


[轉載/Youtube] 港股跌瘋了，恒指失守萬七關，全城淆底！恒指第4季首個交易日埋單大跌770點（4.38%），收報16822點，主板成交763億元。投資者爭相掟貨，面對大跌市，豈只散戶損手閉翳，基金一樣輸到眼坦坦。

大市昨日屍骸遍野，投資者要錢唔要貨鬥快掟貨套現，逾1700隻股份中，逾1100隻股份下跌，568隻股份創1年新低，223隻股份跌幅一成以上，當中不乏散戶基金愛股，當中以濠賭、零售等板塊最傷。博反彈的散戶一再陪葬，昨日共有53隻牛證被強制收回。港股市值跌至15.4萬億元，為09年9月以來兩年多新低。

藍籌中，除煤氣（003）、電能（006）、太古（019）及思捷（330）力保不失，大部份均遭重創，19隻藍籌挫逾半成，其中平保（2318）、華潤置地（1109）及中國海外（688）瀉逾一成，是表現最差3藍籌。

港股未止瀉，經紀鄭先生坦言，「歐洲問題實搞唔掂，雖然德國勤力，但希臘、意大利大食懶，傾唔埋實會爆煲，一爆煲就會拖累美國，跟住全世界都無得走。個市實仲有得跌，只係睇唔到會跌幾多，所以而家無人敢買，得個睇字，好多人等撈貨，咪可能等40幾蚊時執和黃。」

一位紅衫女士亦在街頭哭股喪，「而家聽到投資已怕怕，早前曾經大額損手，蝕咗成幾千萬，都唔知係咪俾人呃。好似嗰時話買賣黃金，呢頭入咗錢買，過幾日就話蝕晒，總之我唔識呢啲嘢，而家咩都唔會再買。」