雜誌驚爆傳梁振英虐妻
梁振英否認虐妻傳聞
[轉載/Youtube] 江湖傳聞兩個疑似下屆特首候選人，都有對手「痛腳」在手，唔少人言之鑿鑿，話醜聞嘅相片、影片、文件乜都有，爆大鑊人證物證俱在，因此唐唐不得不自爆有感情缺失。被「課外活動」困擾嘅唐營，終於有反擊機會，噚日八方在中環飯局，見到個唐唐忠實支持者，未待八方開口打招呼，佢已經搶先搭我膊頭。唐營中人幸災樂禍
「好熟咩！」我心諗。「有冇睇過呢單嘢？」對方隨即遞咗本雜誌畀八方，一睇，唔係壹仔，唔係東周，係最新一期《新維月刊》，封面有句標題：〈梁振英智囊巧設情婦門內情〉。八方未及反應，對方已經揭開本雜誌，「呢單嘢，爆唔爆？」
原來雜誌有個「故事」講特首選舉，標題係〈唐英年陷情婦門 梁振英被傳虐妻〉，撰文者署名孫強，內容主要翻炒唐唐緋聞報道，比較新鮮嘅一點，係引述消息指唐唐嘅「課外活動」或涉及洋婦，由於涉及異族，令北京對挺唐轉趨慎重云云。
「故事」發展下去，話唐營「偶然發現梁振英涉嫌虐妻──打老婆」，「證據」係CY太太唐青儀避居國外，好少亮相，最近才返港。《新維》話如果虐妻傳聞屬實，北京會視乎幾時發生、有幾嚴重而評估係咪畀CY入閘。
CY從政多年，佢太太確係甚少出席公開場合，因此7月帶埋仔女出席CY新書發佈會撐場頗受注目，至於兩夫婦係咪真係如《新維》所講，八方比較保留，不過唐營中人卻似乎好興奮，即使唔係有破壞力嘅黑材料，但作為一單笑料，都講到眉飛色舞。
CY發言人：純屬揑造
CY透過發言人指上述「傳聞」純屬揑造，毫無事實根據，太太只係有時到英國陪仔女放假或開學，大部份時間在港，從無「避居國外」。
大家可能對《新維月刊》一頭霧水，呢本雜誌老闆何頻，出版唔少所謂爆大陸領導人秘聞嘅書，搞過多維網，報道內地異見者消息，出版咗13期嘅《新維月刊》亦以爆中共黨政軍高層「秘聞」為主，呢類雜誌，一般香港人應該冇乜興趣，對象係自由行，唐營中人竟然留意到呢單「虐妻傳聞」，真有趣。
0 comments:
Post a Comment