執董星爺激瘦15磅
[轉載/Youtube] 娛樂圈啖飯真係唔易食！即使貴為「爺級」嘅星爺周星馳，早前為咗拍《大話西遊之除魔傳奇》，35日足足瘦咗14斤，講緊嘅係大陸斤，即係大概15.4磅！橫店趕戲三餐不食
話說星爺做大股東兼執行董事嘅比高集團（8220），今年4月宣佈進軍內地戲院市場，搵咗內地電影「老行尊」印鋼幫手，印鋼每個月都會親自向星爺滙報公司情況。由於星爺早前喺橫店拍緊戲，印鋼當然要親臨橫店探班兼滙報。
聽印鋼講，當晚撞正中秋佳節，佢夜晚12點半到橫店片場，見到執董星爺仲未收工，佢同片場員工吹水打發時間。據場內員工話，星爺7點幾到12點半都冇食過嘢，華華以為星爺只係未食消夜，點知印鋼講，係由朝早7點幾到凌晨12點半，即係早、午、晚都冇嘢到肚。
印鋼聽到之後，馬上搵人送個月餅畀星爺填肚，到星爺收工見印鋼嗰陣，手上仍然揸住嗰個月餅，當時已經係深夜兩點幾。怪唔得星爺喺橫店拍咗35日戲，唔見咗14斤。記得星爺拍《少林足球》時，不時show出一身fit爆嘅鋼條身形，唔知今次《西遊記》會唔會show多次呢？
0 comments:
Post a Comment