排隊黨阿姐 一篋走天涯
[轉載/Youtube] 排演唱會飛、排iPhone4S、排H&M限量時裝，證明咗香港人嘅「排隊基因」相當活躍。人龍裏面，不乏排隊黨傾力搵真銀。直認自己係排隊黨嘅陳佩芬（Eliza）話，做排隊黨要有捱通宵、抵得凍冒雨嘅能耐，有人插隊時要敢於打三條九，仲要隨時有風險空手而回，嗰幾百蚊嘅辛苦錢一啲都唔易賺！「第一次」獻畀劉華演唱會
就如電影《潛逃時空》，時間就係錢，排隊黨「一粒鐘」公價30蚊。有七年排隊經驗嘅資深黨員Eliza，「第一次」係獻畀04年嘅劉德華演唱會。佢其實唔鍾意劉華，「我鍾意張國榮多啲，可惜佢已經唔喺度，只可以睇碟回味」。
但即使「哥哥」在生，Eliza都唔捨得花錢去買飛：「因為我有債務問題，所以先至排隊搵外快幫補。」日排夜排，邊個估到Eliza其實唔鍾意排隊，「最驚就係去人多嘅地方」。Eliza話冇人正職做排隊黨，自己正職做文員，時間許可就去排隊搵外快。排一次隊，佢起碼收五六百蚊，最貴係當年排紅極一時嘅側田演唱會，足足賺咗900蚊：「當時啲學生哥叫埋媽咪嚟排，好墟冚。」
Eliza專責排演唱會，一有消息就出動，唯一目標係要爭頭位，「因為歌迷要close up睇歌星、要握手，歌手擲嘢，要坐近啲先至接到」。所以一間通利琴行個頭位俾人霸咗，就要即時去第二間，但事先要睇吓個場有冇瓦遮頭，唔係落雨就好狼狽。
試過排頭位都買唔到飛
排隊黨經常要露宿街頭，拖住篋嘅Eliza話，竹蓆唔暖，帶紙皮會好啲，因為冬天可以吸「地氣」冇咁凍：「我用過瑜伽蓆，都幾好。如果唔介意，可以帶張被單嚟，點曬點凍，張被可以笠住成個人。」長褲、蚊膏、着拖鞋要着襪；日頭睇書、夜晚瞓覺；準備外賣電話醫肚，做足準備就係成功嘅一半。
韓國人氣歌手鄭智薰（Rain）早前來港開演唱會，Eliza記得當晚報咗幾次警：「因為有人插隊，互相鬧交。差人一嚟到，大家都唔想搞寸個party，盡量有協議。」行行有風險，Eliza話排隊黨都有：「因為有時開賣門票唔多，一開賣，間間通利都會搶飛，我試過排頭位，最後都係冇飛賣。」
0 comments:
Post a Comment