[時事] 何超瓊撐師奶從政

賭王千金變維園阿姐( 2011-09-27 )
何超瓊撐師奶從政


[轉載/Youtube] 賭王何鴻燊二房長女何超瓊（Pansy）一向係女強人，向來只搞大茶飯不談政治，噚日佢突然以神秘嘉賓身份，現身民建聯婦女兵團選舉造勢大會，支持民記女黨員去馬參選，仲大開金口一齊高叫：「民記好姊妹，走入區議會。」睇佢叫口號時極度肉緊，差啲以為佢係候選人㖭。
職場超級女強人肯為民記候選人助選，據聞係因為佢同民記副主席蔣麗芸有啲交情，加上佢都支持女性參政，唔想女人無聲出，所以蔣小姐一叫到，就算佢唔係民記成員，都唔會托手踭，結果親身為民記41位女戰士打氣。
Pansy喺職場上嘅搏命大家有眼睇，但原來佢覺得喺政界上，女性都應該搏命發聲，大讚女人一手照顧家庭、一手掙錢養家絕對唔係易事，所以港女更加要有平台發揮力量。
「其他範疇爭風呷醋」
早前因為「分燊家風波」受盡困擾嘅Pansy仲話，女人喺政壇上唔會「爭風呷醋」，罕有搞爛gag咁話：「因為通常我哋會喺其他範疇先至會爭風呷醋嘅！」唔知佢口中嘅「其他範疇」包唔包括「分燊家」？
好可惜叫女性參政之餘，Pansy無意走入熱廚房，唔似得四太梁安琪咁會瞓身參選立法會議員，甚至連選委會選舉，佢都話唔會參選，無意為抱恙在身嘅老竇代父從軍選特首。
唔做選委啫，都可以落注買定邊個特首跑出啩。但Pansy不單止一提佢老竇就封嘴，亦拒畀貼士評吓唐唐定係CY更適合做特首，只係拋出幾大下屆特首條件，包括有承擔、了解香港、包容不同意見、堅持香港與國家政策配合，唔通係驚押注會惹來全城跟風，到時跑出大冷門就輸鑊金？
八方繼而轉過彎，問佢會唔會支持力倡復建居屋嘅候選人？Pansy竟然話呢個問題好深奧，所以唔答，仲叫大家唔好再揣測邊個係下屆特首，「大家唔好好似睇戲咁睇啦」。港人喺跑馬仔賽事中連票都冇份投，當睇戲咁湊熱鬧都唔係好過份啫。