[時事] 港龍空中煲仔飯暖透心

港龍煲仔飯　夠晒 warm( 2011-10-20 )


[轉載/Youtube] 天文台話今年冬天特別凍，預測準確嘅話，時令煲仔飯嘅銷售額隨時破紀錄。港龍航空喺呢個秋冬時節，將煲仔飯帶上三萬呎高空，畀飛北京同上海嘅客人嘆個夠，希望大家食完暖笠笠。不過煲仔飯只有頭等同商務艙嘅貴客有得食。經濟艙客仔，冇呢啲口福。

頭等有養生煲仔飯
港龍飛機有煲仔飯食，唔係新鮮事物，不過以往只在頭等供應，今個月中開始至明年初，所有商務艙都有得食，包括臘腸雞煲、北菇蒸雞、花枝肉片、蝦乾豉椒排骨煲仔飯。港龍空姐等住你叫，等住你買飛機票。
為咗令一向有煲仔飯食嘅頭等客更顯矜貴，港龍話會將頭等煲仔飯「加料升級」，加入花旗參、杞子、蟲草花、銀杏、淮山等食用藥材整「養生煲仔飯」，等豪客行氣活血、健脾開胃，仲有多款蟹粉菜式任揀。
高空三萬呎，空間有限、又冇明火煮煲仔飯，要煮得好食就要諗計，包括用椰菜冚住個飯，個飯翻熱時唔會蒸發太多水份，經過不斷研究，港龍煲仔飯翻熱後有埋飯焦，風味十足十地面煲仔飯。

經濟艙有奶茶蛋撻
煲仔飯個煲好「辣」手，「辣」到富貴人家嘅手仔好難搞。港龍餐務部經理莊惠心（Kim）話，空姐會將厚餐巾摺成花狀，包住成個「煲仔碗」，空姐送餐時，自己同個客人都唔會「辣」親。一般經濟位乘客食唔到「空中煲仔飯」，Kim話，港式奶茶、蛋撻依然會提供畀經濟艙客人。佢又透露，港龍飛機餐向來以蘿蔔牛腩飯、咖喱菜式最多人like。
喺高空「煮」煲仔飯有難度，Kim承認空中服務員多咗工夫做，有興趣挑戰難度，聽聞港龍明年會請300至400位空中服務員。