施熙瑜選亞姐犯眾憎
[轉載/Youtube] 現年47歲高齡嘅施熙瑜為咗圓選美夢，無懼被取笑係Old嬋參選亞姐，呢幾個禮拜嘅集訓同宣傳，施熙瑜次次都搶晒鏡，其實佢早喺2000年都做過亞姐嘅形象顧問，不過佢今次換咗候選佳麗身份，點知就事事諸多挑剔，又對工作人員呼喝無禮，辣㷫台前幕後做咗眾矢之的。奪其他佳麗衣服
有佳麗爆施熙瑜犯眾憎嘅內幕，佢話：「施熙瑜對工作人員好挑剔，成日批評大會提供嘅衫質地同設計未夠班，佢發晒脾氣，工作人員幫佢度身，佢又彈人哋唔夠電腦化，最荒謬係叫大會嘅衫畀佢旗下公司包辦。」據知，施熙瑜日前見到大會安排其他佳麗嘅衫比佢嗰件搶眼，佢竟發難要人相讓，好唔講道理，俾人搶衫嘅佳麗為息事寧人，敢怒不敢言，施熙瑜又曾試過出動6萬私伙裙搶鏡，佢仲無理要求工作人員替佢保管。
呢15位候選亞姐港澳賽區佳麗後日就會篩剩8個，再加內地幫佳麗下月決戰亞姐大中華區選美，之後選出嘅精英佳麗會滙合東南亞佳麗喺出年1月亞姐決賽一分高下。
0 comments:
Post a Comment