周星馳今表態 盛智文老蘭拍撐唐片( 2011-11-26 )
[轉載/Youtube] 平日連立法會開大會都好少坐足全場嘅李國寶，噚日為咗要公開表態挺唐唐，好罕有咁走去開立法會內務委員會會議，不過寶哥哥咁樣一挺，仲獻出埋佢寶貴嘅「第一次」！就係第一次喺立法會新大樓參加火警演習！亦因為咁，一眾立法會議員發現，原來寶哥哥唔只做銀行家叻，走火警原來仲叻！噚日寶哥哥事先張揚會喺立法會表態挺唐唐，成班記者一早在會議廳外放好晒咪架、攝影機等佢大駕光臨，到差不多開會前，寶哥哥施施然到場，不過佢呢個時候先知原來噚日係立法會新大樓第一次火警演習，既然嚟得開會就要做埋演習先走得。咁佢都好守規矩，先入去開一陣內會，之後就企出嚟見記者，原本佢諗住講完就立即鬆人，但寶哥哥講咗好耐火警鐘都未響，所以佢又只好入返去會議廳繼續開會。
聽到火警鐘 竟然搭電梯
不過對日理萬機、真係秒秒鐘幾百萬上落嘅寶哥哥嚟講，呢個火警鐘真係等得太耐，所以佢又走出會議廳外企定定，十足學生仔等打放學鐘。說時遲，那時快，寶哥哥一聽到火警鐘響，即一個箭步快手快腳搵路走人，但佢唔知係咪平日冇走火警，又或者冇睇過消防處廣告，竟然想走去搭電梯！好彩有記者提醒佢火燭唔搭得電梯，於是寶哥哥又去搵樓梯走，但佢又搵唔到喎！事關佢有幾時行過樓梯！好彩呢個時候陳淑莊經過，話帶佢行樓梯走，寶哥哥先可以安全離開「火場」！
寶哥哥走火警走得咁失魂，何解八方同好多議員又話佢叻？因為好戲在後頭！成班議員走出大樓外，原本要集合點名，點知寶哥哥真係叻，一早叫司機泊定架車喺大樓外，一衝出大樓就立即跳上車，司機嗱嗱聲開車送走寶哥哥，肯定百分百安全脫險！難怪成班議員喺大樓外見到咁情形就一路笑一路呱呱嘈，話有錢人真係條命都貴啲，連火燭較腳都快人一步！
0 comments:
Post a Comment