[娛樂] 曾志偉伸中指 指效「中」胡錦濤

胡主席面前　志偉出中指( 2011-11-25 )
曾志偉伸指效「中」胡錦濤


[轉載/Youtube] 獎門人曾志偉向領導人效「中」嘅方式，真係令八方大開眼界。中國文學藝術界聯合會第九次全國代表大會（簡稱文代會）嘅開幕式上，國家主席胡錦濤等領導人台上致辭，坐喺台下嘅獎門人一個小動作，被中央電視台鏡頭影上鏡播出，引發大陸網民熱議。「曾志偉此舉真是深入敵人內部，刺中了要害。」
文代會星期二喺人民大會堂開幕，中共中央政治局九個常委全體出席，胡主席發言：「要認清時代和人民賦予的神聖使命，堅持為人民服務、為社會主義服務，堅持百花齊放、百家爭鳴，堅持貼近實際、貼近生活、貼近群眾。」

大陸網民瘋傳圖片
一眾政要致辭之際，中央台鏡頭掃過，大禮堂個個正襟危坐，台下第一排枱面上，竟然有一隻伸出中指嘅手，以咁特別方式效「中」嘅人，就係獎門人！眼利網友將呢個畫面cap圖上網瘋傳。「果然是中指。這說明他對台上的發言有疑議和不滿」、「讚，對於說假大空話的，就是要『中』」 、「朝上舉就更給力了」、「威武！就該鄙視這群人！」
為期四日嘅文代大會，據報曾志偉、成龍、汪明荃等港星在場，係首次以代表身份參與。唔知曾志偉咁做係意有所「指」，抑或係巧合，總之令大陸網民無限想像空間同發洩機會。其實文代會一向被指係肉麻擦鞋騷，參與嘅都係同官方同聲同氣，不敢有異議嘅文化人，港星到場只係充當政治花瓶。