訂 iPhone 4S扣數 官網無紀錄
[轉載/Youtube] 近日全城瘋購 iPhone 4S，未知是否因購買人數過多，令蘋果電腦系統無法負荷而出現問題。有 iPhone迷向本報反映，在蘋果網站成功訂機，信用卡亦已過數，惟蘋果網站卻沒顯示訂機紀錄，有人聯絡蘋果客戶服務部要求「回水」，卻被惡言相向，職員回應「幫你唔到」，求助無門。致電查詢被 cut線
在正常情況下，消費者在蘋果網站購買手機後，定單會出現在官網中，消費者可登入其 iTune賬戶查看定單及付運狀況，蘋果約兩至三星期就會送貨。
蘋果迷蔡先生上周五在蘋果網站訂購了四部 64GB iPhone 4S，總數 3,031.59美元，即時輸入信用卡資料付款，之後手機收到恒生銀行短訊，通知他信用卡已被扣數：「我以為已經成功訂咗，點知過幾日再 login入蘋果網站查訂機狀況，竟然發現冇紀錄。」
蔡先生大驚，致電蘋果熱線查詢卻換來一肚氣，他憤怒地說：「條線聽落似係駁咗番大陸嘅客戶服務主任度，一個好重內地口音嘅職員聽電話，好唔耐煩，問極都話唔清楚冇 record，最後仲 cut我線，我家錢又畀咗，機就唔知有冇，又唔知可以去邊度投訴，真係好嬲！」
另一蘋果迷趙先生則指，他購買兩部 64GB iPhone 4S供女朋友及自用，「訂嗰陣有埋定單編號，我仲可以 print到 order，中銀都發短訊話扣咗我約 13,000蚊港幣，但之後打去蘋果熱線問，職員竟然話我訂購唔成功，好唔合理。」
記者發現，網上各大討論區均有網民留言反映類似情況，有網民指已被過數但沒收到蘋果的確認電郵，有人擔心貨款「凍過水」，又指去年 iPhone 4開賣時也曾出現類似混亂情況。有網民表示，蘋果曾經回覆他會向無法付運的客戶退款。本報曾經就事件聯絡蘋果公司，惟至截稿仍然未獲蘋果公司回覆。
0 comments:
Post a Comment