隔牆有耳：韓妹、坡妹膺購物王
[轉載/Youtube]香港一直被譽為購物天堂，旅發局嘅香港購物王大賽，邀請亞太區 10個國家代表同本港代表，前日要喺 8小時內用 2萬元信用卡簽帳額，盡買服飾着上身，化妝剪埋頭髮都得，再喺評判面前行 catwalk、講解購物策略，最後由南韓同新加坡兩組全女班代表一齊奪冠。11支參賽隊伍兩個人一組，大會設定四個服飾主題，包括「戶外全天候」、「職場型格服」、「特別紀念日」同「愈夜愈美麗」。兩支冠軍隊都抽中「愈夜愈美麗」主題，簡單嚟講即係落吧去蒲嘅服飾，咁就啱晒南韓同新加坡兩隊嘅後生女喇。
港代表發揮機會唔大
新加坡代表係兩姊妹，一出場已經好搶眼，本身係模特兒兼 DJ嘅姐姐 Nicole，身形高䠷，誇張頭飾加一雙美腳，甚有台型；橙色頭髮嘅妹妹 Celeste熱褲加閃爍高跟鞋，都唔輸蝕。 Nicole話只係使咗 16,524蚊，最貴係妹妹 2,400蚊嘅鞋，因為要搵好多唔同飾物去襯衫，成個購物過程都好趕，最驚險係由銅鑼灣趕返終點尖沙嘴海港城時，撞正放工時間，等好耐先逼到入地鐵。
總共用咗 18,874元嘅南韓代表，金孝妍及廉智雅服飾冇咁搶眼，但勝在五官標致，行 catwalk之餘，身為歌手嘅金孝妍仲即場唱咗幾句，唱得唔錯，評判拍晒手掌，相信呢度都加咗唔少分。不過，攞到冠軍，主要都係靠廉智雅，佢話一個月平均嚟香港兩次，熟晒地頭，更重要係佢本身都係「購物狂」，最高紀錄嚟香港一次就用咗 20萬元購物。今次贏咗每隊有 20萬元 VISA簽帳額，二人歡喜若狂，話全部用晒嚟買衫、手袋同鞋。
參賽隊伍中有來自印度嘅男演員、日本設計師、台灣知名博客，好多都係潮人，本地代表職業上似乎有啲輸蝕，一個係售貨員陳志輝，另一位係 IT人溫豪傑，佢哋兩個抽到「戶外全天候」，相比其他三個主題，發揮機會唔大，最終力戰而敗。
旅發局主席田北俊係評判之一，佢都順便再回應日前 CNN話星光大道座位少同冇瓦遮頭嘅問題，佢承認好多人去呢度唔代表一定係好嘅景點，會向政府反映，睇吓點改善配套。
0 comments:
Post a Comment