立食壽司殺入港鐵
[轉載/Youtube] 中環租金貴得驚人，食肆難捱貴租，但鬼主意多多嘅JC Shop老闆Francis冇有怕，踩過界做食肆，喺港鐵香港站設立全港首間立食壽司店，新店即叫即製手握壽司價錢比同區嘅平近一半，又首創低脂、高鈣高纖定食，一次過滿足晒OL要好食又要瘦身要求。低脂高纖餐迎合OL
八方噚日冒八號風球去香港站間天下立食壽司店睇吓，舖位面積400平方呎，有八個企位，環境光猛企理，學過整壽司嘅Francis，一邊手握壽司一邊講，鐵路立食壽司店喺日本有30幾年歷史，因為當地租金貴，只設企位可以減低租金皮費，立食又方便趕時間又要慳錢嘅上班族，所以喺當地有唔少捧場客，香港情況類似，相信立食文化都可以立足。
Francis話：「用咗立食形式經營，租金變相減輕兩、三成，可以平賣日本料理級嘅壽司。好似手握三文魚壽司一碟兩件只係14蚊，同區要26蚊，平近一半。」佢選擇中環開第一間舖，係睇中唔少中環OL鍾情日本壽司，貪唔會食肥。
佢特別設計咗兩款低脂同高鈣高纖壽司定食，前者有日本柚子醋沙律，八爪魚刺身配鮮青瓜餐前小食，加埋什菜露笋卷等三款主餐任擇其一，賣48蚊起；後者高鈣高纖套餐有沙律、什菜、同餐前小食冷豆腐之外，仲有三色腐皮紅米卷等三款主餐揀一款，「家啲女仔食壽司，又要好食又要食得瘦，要花啲心思設計滿足佢哋要求」。
其實家陣中環站都有立食快餐店，餐飲聯業協會會長黃家和話，港鐵沿線街舖租金貴，不設座位嘅立食壽司店概念新穎，唔使捱貴租，應該有得做，「但係一定要注意環境衞生，同埋人群管制，塞住入閘通道就唔好嘞」。
發現走寶 MTR食回頭草
全港首間立食壽司店落戶港鐵香港站，老闆JC shop董事總經理Francis話得來不易，同港鐵傾足五年先成事。佢話港鐵開綠燈，原因之一係今年2月佢喺澳門威尼斯度假村酒店率先開當地首間立食壽司店，港鐵知道走寶，先至食回頭草。
Francis話澳門店開張第二個月已有賺，400萬投資半年回本，港鐵店投資約300萬元，計劃明年沿港鐵線再開三間分店，目標係尖沙嘴同金鐘，包括一間立食拉麪店，亦會進軍內地。
0 comments:
Post a Comment