[娛樂] 港姨騎呢舞紅爆英國

重口味港女　擘脾熱爆英倫(2011-09-08)
《殘酷一叮》狼擒城城唔掂　　港姨騎呢舞紅爆英國


[轉載/Youtube] 人冇夢想，同鹹魚又有乜分別？由細已認定自己係明星嘅48歲嘅香港人「港姨」Goldie Cheung，上月參加英國電視台真人表演節目《X Factor》，憑超重口味嘅騎呢舞姿同狂野演繹，贏得評判同觀眾激賞，外國傳媒爭相報道之餘，甚至用「傳奇」嚟形容佢，而YouTube片段已累積20萬瀏覽次數，港姨風頭一時無兩。
未上台到處嘔
話說港姨當日未上台已搞到天翻地覆，除咗佢套超性感流蘇戰衣夠重口味外，佢又緊張到通處嘔，搞到人人怕咗佢。不過港姨一上台就醒神晒，主持問佢貴庚，佢仲好風趣咁話：「過咗半世紀啦！」
肥腿騎評判頸
好嘞到戲肉，港姨揀咗首冇乜人識嘅《Copper Bell》嚟唱，隨住音樂響起，佢深呼吸大喝一聲，四肢就失控擺動，之後佢邊自摸邊行埋評判側邊，一隻肥腿硬塞埋男評判條頸度，搞到佢鬼咁尷尬。港姨越跳越high，又擘髀又玩一字馬，最後仲趷起個八月十五對住觀眾！全場觀眾high爆，結果佢亦順利晉級。
查實任職太極導師嘅港姨，05年都參加過無綫嘅《殘酷一叮》，當年佢以「豹姨」諢號喺郭富城面前獻唱《黑夜的豹》，過度活躍嘅佢同樣衝埋評判團度搞搞震，嚇到城城縮縮不行鳥。只可惜港人唔識貨，當日佢只係攞得幾千蚊走，同家爆紅冇得比咯。