內地富豪來港 潮訂婚前協議 「子孫都要簽 免家財被瓜分」
[轉載/Youtube] 愛情雖無價但婚姻代價高，豪門富戶感受更深，有提供婚姻家事法服務的律師指出，內地富豪及富二代來港訂立婚前協議激增一倍，以免離婚時家族財富被瓜分，律師行剛處理一宗內地上市公司主席為兒子訂婚前協議。記者：謝明明、林妙萍、溫敏芝衛仕達法律事務所律師古明慧接受訪問時指出，婚前協議早在歐美流行多時，雙方自願在公證人前訂明離婚後的財產分配方法，「例如邊啲婚前財產唔計算在內，好似父母遺產得益，或者上市公司利益等。另外婚後收入，甚至結咗婚幾耐離婚可以獲得幾多，每生一個子女又可以獲幾多。」
律師行生意激增一倍
近年，越來越多內地富豪簽訂婚前協議，甚至為富二代、富三代簽婚前協議，以保障家族財產，「啱啱喺本月初幫內地一間上市公司主席搞咗份婚前協議，佢要準備結婚嘅仔同家族其他第二代成員都要簽呢份協議，甚至希望子子孫孫將來結婚都要簽，唔想家族財產被瓜分。」
古稱，其律師行以往平均每年處理5至6宗婚前協議，但過去一年激增一倍，達十多宗，客戶以外國人及內地人為主。她指出，內地承認婚前協議，但內地法院處理內地資產為主，欠缺處理環球資產經驗，「如果資產集中喺內地，咁當然喺內地搞〈婚前協議〉，但如果資產分佈世界各地，咁就適合喺香港搞，始終我哋喺處理全球資產有豐富經驗。」
本港法院不承認協議
至於港人，則較少做婚前協議，「本地人通常都係有錢家庭，即係有幾千萬身家，或者有一定財富嘅專業人士先至做，一般人冇咁嘅需要，因為財產唔多嘅話，協議作用不大。」古明慧承認，本港法庭尚未承認婚前協議，只作參考，法官會按照公平原則，將離婚夫婦財產均分，「但呢個唔係絕對性，法官仲會考慮埋年齡、結婚年期、子女數目、生活水平、對家庭貢獻等，當然法官亦會考慮埋婚前協議。」
有處理婚前協議經驗的律師黃國桐則指出，近年越來越多本地專業人士簽訂婚前協議，「佢哋好多係40幾歲，有一定資產同成就，對愛情唔會太盲目，佢哋會好仔細咁寫明一旦離婚財產點樣分配。」但黃坦言，不鼓勵客戶簽婚前協議，因為這類協議在本港無法律約束力，法官只會參考，「只係證明心願，並非唯一嘅法律證明，而且仲有可能令單官司複雜化，咁做嚟做乜？」
婚前協議是甚麼？
目的：保障一旦離婚雙方資產權益
如何訂立：雙方婚前自願於法律認可公證人協助下，擬訂及簽署一旦離婚財產分配書面協議
所需時間：視乎協議內容複雜性，由一、兩小時至數月
收費：視乎協議複雜性，由約兩萬元至十多萬元不等
資料來源：律師古明慧
0 comments:
Post a Comment