[時事] 學晒美國V煞 玩佔領中環

V煞：佔領中環　下周公演( 2011-10-08 )
學晒美國V煞　玩佔領中環


[轉載/Youtube] 美國一班工人、學生發起Occupy Wall Street「佔領華爾街」運動，初時烏合之眾，點知一發不可收拾，有人更喺網上號召全球民眾，今個月15號（下周六）起革命，佔據各地金融中心，希望迫使政府同金融巨頭改革，據講有超過350個城市嘅民眾響應。

警方好緊張四圍收風
香港特區叫得做紐倫港，自然有份，有網民幾日前喺facebook開咗個「Occupy Central佔領中環」群組，已經有500幾人Like咗。雖然人丁單薄，但據講已令警方緊張兮兮，急急四圍收風。群組開宗明義呼籲摒棄「中環價值」，「以道德良知重建香港社會價值」，打倒「魔鬼」嘅資本金權王國，至於實際有乜行動，同具體佔領中環邊處，則未有定案。
有網民話行動名正方言順，既然美國叫「佔領華爾街」，香港應該「佔領××街」，目標包括畢打街、銀行街（滙豐總行與舊中銀之間）或者金融街（國金對出）；但有網民覺得，中環係地產同金融霸權總部所在地，家向金融同地產霸權宣戰，叫佔領中環最貼切恰當。
早幾日，一班掛名「社會主義行動」嘅人，遊行去美國駐港總領事館，聲援佔領華爾街行動，八方問過搞手之一鄧美晶Sally，佢話「佔領中環」唔係佢哋統籌，係網民自發，細節未定。據聞今次積極參與行動嘅網民，唔少係平時活躍社運嘅80後，亦有越嚟越紅嘅V煞面具朋友。

雷曼苦主最早玩佔領
「佔領華爾街」好似好出位，其實香港早已有之，08年雷曼爆煲後，一班雷曼苦主幾乎日日喺中環各大銀行嘅門口掛橫額、嗌口號示威，聲勢、動員能力較美國「佔領華爾街」有過之而無不及，多間銀行後來賠償苦主，網民有樣學樣「佔領中環」，唔知算係崇洋抑或效顰。
一直協助苦主嘅民主黨議員甘乃威話，家仲有成2,000個苦主未獲賠償，如果有人號召佔領中環，相信雷曼苦主一呼百應。