統治無綫44載 六叔今104歲生日
[轉載/Youtube] 【萬千星輝頒獎典禮2011】今日是無綫揸弗人六叔邵逸夫104歲生日，也是他統治無綫44年的台慶大日子。有傳六叔今年台慶後退位，今晚將是他最後一次以董事局主席身份出席台慶，難怪今晚負責傍住六叔的港姐朱晨麗和朱希敏，昨日坦言心情緊張又榮幸。四年前本報破解六叔邵逸夫生日之謎，發現於農曆1907年10月14日出生的六叔，新曆生日正是11月19日，即是無綫台慶大日子。1967年開台的無綫，每年11月19日例必全台總動員表演賀台慶，同時為六叔賀壽，雙喜臨門。至今日，六叔已年屆104歲高齡，統治無綫足足44年。
不過，早前有消息指六叔計劃在今年台慶後宣佈退位，由今年新加入的股東殼王陳國強接棒擔任主席一職，而無綫更有意為六叔申請入健力士紀錄大全，成為最年長的董事局主席。
港姐傍實睇表演
有指今晚是六叔最後一次以主席身份出席無綫假將軍澳電視廣播城舉行的《萬千星輝賀台慶》，是以一眾小生花旦定必瞓身落力表演，為六叔和無綫賀壽。
今晚肩負照顧六叔重任的港姐冠軍朱晨麗和亞軍朱希敏，雖然對六叔台慶後退位一事不知情，但二人異口同聲表示若為事實的話，自言感到十分榮幸。朱晨麗昨在電話中說：「平時冇乜機會見到六叔，所以好珍惜同佢見面嘅機會，打個招呼。我唔知六叔係咪退位，如果係真嘅話，我會覺得好榮幸。今晚我都會有表演，心情都有啲緊張㗎，不過，我會抱住開開心心嘅心情做好呢個騷。」
朱希敏：好榮幸
朱希敏則說：「我冇聽過六叔退位，如果係嘅話，我會覺得好榮幸。」會否打扮性感一點，讓六叔眼前一亮？朱希敏說：「我會着番參選世姐決賽當晚着過件晚裝，因為呢件衫對我嚟講特別有紀念價值。」
此外，馬賽及黎諾懿等昨日為台慶跳舞表演綵排，對於有傳六叔將在今晚台慶後退位，問馬賽可會穿得特別隆重性感一點？她說：「咁又唔會，試過仲係港姐時好性感，坐六叔隔籬仲走光！」
黎諾懿表示：「冇聽過呢個消息，不過一向工作都會落力嘅！同埋唔只係畀六叔睇，都係娛樂大家嘅！」
0 comments:
Post a Comment