禮頓道印尼餐廳 經營半世紀 加租三倍 米芝蓮食肆結業
[轉載/Youtube] 租魔肆虐，米芝蓮食肆也被迫結業。經營近半世紀的印尼餐廳，其銅鑼灣禮頓道主店上月底悄悄結業，名人街坊食客愕然，原來是遭業主瘋狂加租逼走，「可能想租俾啲名牌大舖」，第二代揸fit人蔣翹帆（Hudson）慨嘆未能守住祖業，愧對父母，也不滿特色食肆被租魔趕盡殺絕。銅鑼灣禮頓道「印尼餐廳」，午膳晚市總座無虛席，藝人周慧敏、甚至新鴻基地產副主席兼董事總經理郭炳聯也是坐上客，今年更首獲《米芝蓮》推介，大讚其沙嗲串、巴東牛肉有特色。2003年起扛起祖業的蔣翹帆以為終於媳熬成婆，卻沒想老舖在10月被迫火速結業，「間舖敗喺我手。」
業主：你哋畀唔起租
由守業第二代淪為「敗家仔」，源於上月75歲蔣老先生，如常到店內打躉時收到一封信，讓行過船見慣風浪的他，也像無助小孩般致電大兒子Hudson，「佢把聲震晒，話業主要收舖。」
印尼餐廳也是香港故事，蔣父與妻子早年由印尼經內地落腳至此，如許多香港人般艱苦，蔣父決定行船，至1968年薄有積蓄便與友人合資在銅鑼灣恩平開道設印尼餐廳，1984年搬至現址：「父母當呢度係家，10號風球都番嚟，親戚新年都嚟呢度拜年。」
面臨收舖，Hudson遂約業主傾談，但只獲業主助手「敷衍」，「問佢想加幾多租，佢話你哋畀唔起租㗎喇。」他主動將月租由10多萬元調至20多萬元，但也迎來冷面孔，「我哋生意唔錯都要執笠？震驚到唔識反應。」
無奈，銅鑼灣印尼餐廳10月30日無聲無息結業了，「我同最後光顧嘅鬼佬講，佢係最後一個客人，請佢飲咗支啤酒。」翌日，工人用鐵鎚將悉心設計的型格門面敲碎，數十年心血只餘破磚。
「熟客冇串燒食」可不理，自己重操故業當網頁設計也沒難度，但年邁雙親感情寄託頓失，才最叫Hudson與家人心痛，「呢幾日阿爸成日話要番嚟睇吓，阿媽陪佢去維園散步。」Hudson昨在廢墟般的舊舖邊指邊說，「阿媽個屁股黐喺個收銀櫃唔走，我就黐住佢；呢個卡位我（以前）喺度做功課，嗰個卡位就係瞓晏覺嘅。」店舖是生計，也是回憶。
旺角分店月底又滿約
蔣老太應記者要求來拍照，外表年輕的她中氣十足，「梗係有感情啦，但要加三倍租，你教我點做？做人要向前看，啲仔會搞掂，我要去接孫放學。」不過，臨行前她忍不住偷看破爛店舖，「做乜鑽到咁嘈㗎？」
Hudson說印尼餐廳只剩旺角新世紀廣場分店，但因廣場翻新，租約也至月底完結。他努力找新舖位，但發現銅鑼灣租金貴得驚人，「聽講有間雲吞麪舖加到150萬蚊租，每日賣幾千碗都唔掂啦。」他最後在中環皇后大道中Lplace覓得月租20多萬元的樓上舖，料下月底重開，「都擔心租金遲早再加。」
他聽聞銅鑼灣特色食肆都對租金狂飆壓力，料農曆年後會有執笠潮，只餘下可負擔驚人租金的名牌店或連鎖舖，「咁香港仲邊有特色？」
0 comments:
Post a Comment