[娛樂] TBB捐近千套電影菲林

電影珍藏番生　下年有得睇( 2011-11-18 )
TVB捐近千套電影菲林


[轉載/Youtube] 八方幾鍾意睇戲，因為電影可以將當時嘅社會面貌，活生生咁紀錄低，好過睇歷史書，無咁悶。無綫電視自從1967年啟播以來，收收埋埋好多電影Copy，噚日佢哋就將937套歷史珍藏電影菲林，移交香港電影資料館永久保存、研究。
呢批歷史文物入面，最舊一套電影係1939年嘅《小俠女》，最有價值嘅就應該係1949年製作嘅《黃飛鴻正傳》上、下集，相信係現時碩果僅存嘅Copy。截至2006年，以黃飛鴻為主題嘅電影有103部。呢部上、下集正正係成個系列嘅始祖，仲加插咗「虎鶴雙形」同「五郎八卦棍」示範片段，為Chinese Kung Fu打響頭炮。其他廣為人熟悉嘅《玉女添丁》、《呆佬拜壽》等電影菲林，都係移交之列。

電影資料館最快出年公映
電影資料館館長林覺聲話，呢批菲林，有近六成係現時資料館冇嘅，令館藏即時增加一成。館方會將菲林保存喺攝氏4度嘅資料庫，經過修復之後，預計最快出年電影節可以畀公眾欣賞。
TVB助理總經理區偉林話，呢批菲林得以重見天日，係一個巧合。事緣舊年TVB配音部希望增闢地方，搵到一個長年上鎖嘅房間，打開之後先發現原來入面放滿珍藏，最後決定轉交資料館保育。