芬婆扮財演 反跟有金執 - 股榮
[轉載/Youtube] 新股排隊抽水，一向作為新股大好友的劉央，上周被問到會否抽周大福（1929）時嗤之以鼻，聲言自己是價值投資者，現時通街都是4、5倍PE平貨，點解要買15倍PE的周大福呢？講就無敵，但睇番牛央（劉央綽號）今年戰績，認購的新股隻隻仆直，話股市見底抵買，殊不知越買越平，真係燈到爆。其實市況不就，芬佬（基金經理）跑輸大市絕不出奇，屬非戰之罪。但部份表演慾較強芬佬或芬婆，可能已忘記本身角色，積極向傳媒吹噓，某程度已淪為高級版財經演員。財演要出位靠兩種，一是逢估必中，一是逢估必錯，前者百中無一，真的每次開口中，相信已經收山自己搵食。後者則可遇不可求，矜貴程度拍得住熊貓，單睇劉央今年向傳媒「吐料」，投資者對着幹反而有得執。
最經典是今年7月大跌市開始，接受兩本周刊訪問，揚言股市跌無可跌，現時為非常難得的買貨機會，結果港股7、8、9月停到唔停，捧場客長買真的死得。只有唱好不唱淡的劉央，10月港股喘穩之際，突然在財經報紙轉軚，稱大市面臨崩盤，恒指將跌破15000，當時大市已由谷底16000升返18000邊緣，惟牛央變熊央後，大市繼續挾升，半個月內逼近20000水平，所謂崩盤未有出現。
「有好嘢點會益人」
劉央旗下管理的西京投資基金，規模屬於中型size，在行內具有一定影響力，至上月底資產管理規模約36億元，手持多隻股份，持股比重皆超過5%，就是因為具有江湖份量，其一言一行備受外界注目。在此要為劉央平反，雖則旗下基金今年累蝕超過25%，但彭博綜合其類別排名中，今年仍是表現最佳五隻基金之一，保住「女版畢菲特」之名，只慶幸同業一蟹不如一蟹罷了。
芬佬接受傳媒訪問，一般只是漫遊太空，只講宏觀，絕少推股，如劉央般暢所欲言，實為異數。問過芬佬朋友，點解不能對記者暢所欲言，他們指一來證監睇到實，二來亦是最重要，「有好嘢，點解唔益客要益人」？答案是一針見血。
今年港股前路確係一片迷惘，多謝劉央，令我可以撥開雲霧，摸清方向。
股榮
0 comments:
Post a Comment