門常開：龜仙人狼擒兔女郎
[轉載/Youtube] 特首小圈子選舉有豬狼對決，屯門一個校園都上演咗一幕龜兔困獸鬥。話說屯門馬可賓紀念中學嘅校長陳加恩係一個愛兔之人，97年創校以來就喺操場花園養兔仔。不過多年來，啲兔仔唔係俾野狗咬死，就係自相殘殺，校園嘅兔仔一度絕種。但係最近又有教友送咗一對迷你荷蘭兔畀學校，校方將佢哋同九隻龜養埋一齊，又出事嘞。疑似咬傷兔仔
有家長見到其中一隻兔嘅耳仔有傷痕，又見住籠裏面嘅一隻巨大盾臂龜追住隻兔，懷疑盾臂龜咬傷咗迷你兔，於是向愛護動物協會舉報，告校方虐畜。愛協督察先後巡查過兩次，發現校方真係將龜兔養埋一齊，雖然證實唔到龜咬兔呢單嘢，但係認為巨龜的確對兔仔嘅性命存在威脅，而且兔仔鍾意隨處便溺，對同居嘅龜龜都冇益處。
馬可賓中學已答應棄養兩隻迷你兔，將佢哋物歸原主。校方冇向記者解釋，點解佢哋會將龜同兔養埋一齊。根據愛協嘅講法，校方呢個構思係來自「龜兔賽跑」呢句成語，以為佢哋住埋一齊會生活得開心啲。估唔到，呢場屯門校園版龜兔賽跑，結果都係龜贏咗，兔仔，out!
吳爽
0 comments:
Post a Comment