李丞責批龍年政黨易勢 民建聯運滯
[轉載/Youtube] 剛喺區議會選舉取得空前勝利嘅民建聯，風頭可謂一時無兩，不過，世界輪流轉嘅。著名玄學家李丞責就預測呢個長期佔優勢嘅政黨，踏入龍年形勢會出現大逆轉，流年好濕滯。有人事傷痛或衝突矛盾
近日有網民發現李丞責喺佢剛出版嘅龍年預測運程書中，指一個長期佔優勢、幾乎從未聽過鬧分裂嘅政黨明年內部會有人事分離迹象，根據呢個黨所屬嘅星象，需面對有苦澀味嘅經歷，實力會大不如前。李更指出，呢個黨嘅主席喺龍年嘅運勢係咁多年最弱嘅一年，小則有病，大則有血光之災。仲有佢嘅家庭或機構內部亦會有人事傷痛或衝突矛盾，主席惟有用自己僅有方法向四方求助，但最令人詫異是，在某些問題上政府會向呢個黨追究。
李丞責寫到咁白，明眼人都知講緊民建聯，八方向李師傅求證，佢笑笑口話唔會講邊個政黨，「總之大家睇完就會知邊個」。佢話明年會出現「日環食」呢個天文現象，喺古時代表政治、法制、民生健康會出現變動，加上明年龍年係壬辰年，即表示人事新舊會有交替，好似明年就有新特首上場。
佢話每年都會幫政黨同政治人物占卜，但佢唔想牽涉政治，所以好少講占卜結果。不過，今次發現呢個政黨嘅流年運勢比起其他政黨有好大落差，佢先至寫出來，希望呢個政黨可以及早趨吉避凶。
被問及呢個政黨如何化解呢個劫，李話，要作出人事調配，如果唔係，明年立法會選舉會失利，大熱人選或會敗選墮馬。咁講法咪即係叫民建聯主席譚耀宗退位讓賢？
「日環食」代表領導更替
八方問另一位玄學家麥玲玲，佢亦指出，「日環食」現象代表有影響力嘅政治領導人物會出現更替，例如明年新舊特首替換，而明年亦係中央領導層變動嘅關鍵時刻，而本港男性政經領袖健康或會出現問題。
至於對政黨嘅影響性，麥師傅話要睇埋政黨核心人物嘅時辰八字，「因為個黨係由呢班核心人物帶領，要睇埋佢哋嘅時辰八字先至準確預測對個政黨嘅影響性」。
八方認為，以民建聯咁財雄勢大，背後有強國支持，就算流年有幾不利，相信阿爺一定會出手相助，更何況強國國勢強到可以稱霸宇宙，呢點小事又點會怕。
0 comments:
Post a Comment