子淇月吞百隻雞 湊千億肥仔
[轉載/Youtube]「千億新抱」徐子淇今年6月生下被形容「觀音送子」的慈姑椗，為李家繼後香燈。子淇乖仔由公公改名為李俊熹，老爺四叔大讚名字夠響亮，萬千寵愛的俊熹，兩個多月已變成13磅肥白「相撲B」，子淇坐月期間乖乖吃足100隻雞，又做GYM，操fit體能親自湊仔。徐子淇自從06年與恒基二少李家誠（Martin）結婚後，努力生兒育女，一心組成大家庭。婚後三年抱兩，先後誕下兩女晞彤、晞兒，今年6月成功追仔，剖腹誕下男嬰，一直恨抱子淇所生男孫的老爺四叔李兆基，笑到見牙唔見眼，豪派千萬利是。
13磅相撲B日食6餐千億肥B轉眼兩個多月大，李家誠徐子淇抱着乖仔享天倫的合照首度曝光。由爸爸李家誠抱住的B仔，出世時只有6磅，但現時體重倍增至13磅，眼仔精靈、雙下巴，非常得意，肥肥白白的「節瓜腳」似足相撲手，相當重手。
由於子淇之前兩胎都是囡囡，拍照都着靚靚裙仔，今次囝囝則豪氣地光脫脫，只是着褲仔出鏡。BB由外公徐傳順改名俊熹，英文名Triston，沒有跟隨李家傑的三胞胎用「智」字排名，子淇就表示：「其實李家根本冇族譜，個名都冇特別意思，爺爺（四叔）好鍾意，覺得個發音好響，佢日日湊孫，成日話阿B似Martin。」
子淇透露俊熹一日吃6餐，每餐吃5安士奶：「佢個人仔好為食，見到大人食嘢，會睇到眼定定。」不過她指阿B都識挨住嗲她。大女豪擺百日宴，二女也開兒童派對，但子淇表示今次不會大搞：「我哋唔搞百日宴，會同啲親友食飯。」熱愛大家庭的她，目標是生5個，但之前老公下令她休息道：「最緊要養好身體先，唞兩三年先。」
親湊三兒女極速收身囝囝斤両十足，子淇親力親為湊仔湊女，也成功收身，體重回落到120磅水平。她坦言湊三個仔女，已經夠忙，第三次坐月的她，為了調理身體，一日三餐吃雞，養足精神體力，她說：「之前兩胎冇咁乖，冇食咁足，今次真係食足100隻雞，因為自己責任重大，一定要有健康嘅身體，先可以照顧到佢哋。」子淇坐月期間，不敢怠慢，三餐吃雞補身、吃飯（正氣），早餐吃紅糙米木耳蒸雞、燉雞汁，午餐和晚餐就竹絲雞湯、雞飯加薑等，十二朝後再加飯雞酒，但就並非外傳吃花膠、人參補身。
徐子淇湊三個仔女，早上親自帶女兒返學，再陪仔女，夜晚就和老公二人世界，一齊吃飯傾偈，早前趁住兩個女放暑假，她和Martin更首次一家五口去旅行，輕鬆享天倫樂。子淇分享湊仔女經，坦言湊大女晞彤時，因為太緊張，令到大女比較依賴、「小姐啲」、「論盡啲」，到湊二女就比較放鬆點：「我多咗畀佢自己試，佢跌倒我只會遠遠望住，等佢自己起身，佢比家姐獨立，一歲幾識得自己飲水、識着衫着鞋。」
子淇拒做怪獸家長，坦言不想三個子女太受保護，也曾帶她們去坐巴士、搭地鐵，也會訓練她們自己用錢買雪糕，學找錢等，令她們感受一般兒童的日常生活。在家中，爺爺、爸爸就會和三個小朋友講廣東話，自己就用英文和她們溝通，讓子女在日常生活中，學習英語。三個子女和大伯李家傑的三胞胎智信、智仁、智勇年紀相若，也經常一齊在千呎playroom玩，玩平衡木，跳彈床。
採訪：林妙萍
中西會診：過補食壞胃
徐子淇在坐月期間依秘方餐單食足100隻雞，究竟對調理身體有沒有幫助？記者昨天致電關之義中醫師，他表示產後婦女一般消化能力較弱，他補充說：「一般肉類，蛋白質多嘅食物都比較難消化。」他強調食雞確可補身，但效果要視乎當事人的身體狀況，他說：「勉強進食過多補益食物，會浪費食物，嚴重就加重脾胃負荷，造成毛病。」而西醫龍炳樑就直言雞是脂肪較低，蛋白質高的肉類，而用來煲湯沒甚麼特別
0 comments:
Post a Comment