[娛樂] 卓韻芝傳秘嫁MJ「唔係我嚟」

韻芝秘密嫁 MJ冇人知( 2011-09-13 )
卓韻芝傳秘嫁MJ「唔係我嚟」


[轉載/Youtube] 樂隊Mr.成員近日紛紛傳喜訊，繼鼓手杜志烜（Tom）同陽光妹何思諺日前宣佈搞出人命將會結婚，近日本報收到讀者報料，話另一成員譚傑明（MJ）同前女友卓韻芝，喺年頭已經秘密結婚，點解咁講？個讀者話識得幫佢哋影婚紗相嘅攝影師，而且結婚行禮當日都係由佢朋友揸機負責影相。
結婚咁開心，當然即刻搵當事人求證，前日打電話問卓韻芝係咪年頭同MJ結婚？佢否認：「冇呀，真係好想睇吓啲結婚相，我懷疑係MJ同個好似我咁樣嘅人結婚，唔係我嚟，快啲搵啲相出嚟睇吓。」

自稱冇拍拖
年初阿芝先宣佈同MJ分手，咁分手後有冇復合？阿芝強調冇，大家亦好耐冇見，很少聯絡。咁阿芝家有冇拍拖？佢笑笑口話：「冇呀，冇時間。」咁恨唔恨嫁？佢好老實咁講：「恨搵到一個愛嘅人，家要搵到嗰個人先。」會唔會秘密結婚？阿芝話如果男方想保密，佢會絕對配合。

至於MJ都透過唱片公司否認婚訊，不過佢哋私下係好朋友就絕對係真。