TVB化妝間有賊 周家怡失手袋報警
[轉載/Youtube] 無綫女藝人周家怡噚日凌晨五點幾喺微博度話自己好唔開心，原來佢前晚喺電視城錄影完《變身男女 Chok Chok Chok》之後，喺電視城一廠嘅化妝間唔見咗個手袋，佢話錢雖然唔係唔見好多，但全部證件都喺晒裏面，仲有記事簿寫低每日嘅schedule同一啲私人嘢，希望報警之後可以搵番啲失物。藝人圍插賊仔
噚日下晝，周家怡又喺微博留言，佢自我安慰咁話：「因無咗個袋同私人物件而唔開心，不停諗點解，但當我諗到偷嘢嘅人可能好需要錢先至咁做，惟有寬恕佢，望佢唔好再偷嘢啦，因被偷人會無咗好多買唔返嘅嘢而好唔開心㗎！」
好多朋友都留言安慰周家怡，好姊妹佘詩曼話：「我希望偷你個袋嘅人，終有醒悟和內疚嘅一日。」曹永廉就話：「希望小偷有良心將証件放在郵箱，我會叫《法證先鋒Ⅲ》的黎耀祥幫你查查。」
事後周家怡喺電話度話：「真係好唔開心，六合彩又唔見我中，真係好黑仔，不過都係一個教訓，我一世都會有陰影，但係都希望我呢個教訓可以令其他同事知道，要小心自己嘅財物。」外事部曾醒明話公司會配合警方嘅調查，希望所有藝員同事小心保護自己嘅財物，公司亦會加強保安。
0 comments:
Post a Comment