[時事] 靚咖啡妹妹跳出麥記 殺入立法會

靚啡妹跳出麥記　殺入立法會( 2011-11-17 )
立法會　咖啡妹醒神


[轉載/Youtube] 官員、議員去立法會開會，成日俾人捉到佢哋「釣魚」，又係嘅，高官議員嘅議事質素低落，瞓着覺都係人之常情。立法會秘書長Pauline諗咗個方法，可以幫佢哋提提神──就係向麥當勞嘅McCafe挖角，撬走一位年輕可人嘅咖啡妹妹，專責喺立法會咖啡閣替高官、議員「注射」咖啡因。

比老麥人工多四成
佢叫Willcy（陸浩雯），今年22歲，唔好睇佢年紀輕輕，已經有5年冲咖啡經驗，係立法會新請嘅管事，職務包括冲咖啡同埋傳遞文件。Willcy讀旅遊及酒店高級文憑出身，之前喺McCafe冲過五年咖啡，本來佢已升咗做高級咖啡師，但立法會以月薪14,935元請佢，仲有約滿酬金，比起在老麥人工多四成，Willcy就係咁冲到添馬艦立法會。
立法會請咖啡師好認真，共有廿幾人面試，最終只有七位入圍，全部要喺四個立法會秘書處評判面前表演冲咖啡、烘多士，Willcy最拿手就係冲latte，用絕招力壓其他應徵者。秘書處最後亦多請兩人應付繁重工作，其中一個仲係大學生，稍後先至返工。
雖然「咖啡妹妹」唔使做街客生意，但係請佢嘅Pauline話，喺立法會做一樣辛苦，因為隨時要同議員一齊開通宵，又要講得一口流利英文同普通話，事關年中有唔少外國領事之類嘅貴賓參觀立法會大樓，Willcy都要接待佢哋。

議員讚賞有成功感
已服務議員兩星期嘅Willcy話好緊張，因為飲佢咖啡嘅多數係名人，各有各喜好，「黃毓民議員鍾意飲齋啡，陳淑莊議員就鍾意飲skimmed milk咖啡。有日黃毓民議員話我冲嘅咖啡好好飲，都好有成功感㗎！秘書長吳文華就朝朝嚟幫襯」。
10蚊杯嘅立法會咖啡咁好飲，Willcy背後仲有個「英雄」，就係身價四萬九千蚊嘅La Cimbali咖啡機。好奢侈？未算，舊立法會大樓部咖啡機仲矜貴，據講身價成10萬銀。