[時事] 西貢老店永和海鮮酒家 結業退休

西貢老店　忍著淚說 goodbye( 2011-12-01 )
昔日明星竇　　西貢老酒家結業


[轉載/Youtube] 再多一間舊式酒樓成為歷史！今次光榮結業嘅係西貢永和海鮮酒家，呢間有41年歷史嘅老牌酒家曾經風光過，影帝周潤發都做過座上客。老闆堅持唔收加一又抵食，唔單只老街坊支持，仲吸咗班行山客假日嚟打躉。不過，老闆劉玉靈就話，近年生意難做，有時仲要倒貼，加上自己都68歲，所以就算唔捨得，都要退休。

食客鍾意自助形式
永和海鮮酒家喺1970年就開門做生意，年紀仲大過八方，樓高4層，最多可以擺70圍。喺酒樓做咗38年嘅經理周滿堂話，以往好多時一擺酒就擺足個幾月，每日都擺幾十圍，好熱鬧，加上當年邵氏、亞視啲片場、廠房喺附近，不時有明星幫襯，好似發哥、梁朝偉，同鄭則士都嚟過。
一直有咁多街坊撐，點解都唔做？劉老闆話，近呢幾年生意越嚟越難做，租金、來貨價都貴咗好多，好多時都冇乜錢賺，仲要貼錢。不過，本身係西貢原居民嘅佢話，茶樓係服務街坊，結束茶樓唔係話蝕錢肉痛，而係自己年紀大，仔女又冇興趣接手，所以趁住租約滿，三個月前決定做埋噚日就唔做喇。
唔少街坊話唔捨得，好多人專登返嚟食吓傳統嘅雞球大包、鵪鶉蛋燒賣咁，「有啲當年喺度擺酒結婚嘅，或者係賣過點心嘅，都專登返嚟影相㗎」。好似永和呢類咁傳統嘅酒家，係冇點心紙嘅，啲客係要去蒸櫃自己拎，埋單都係靠數蒸籠有幾多個。劉老闆話，啲客人好習慣自助形式，會自己冲茶，又鍾意親自揀點心，酒家雖然間唔中有裝修吓，但就保持呢種做法，驚改咗啲客反而唔慣。
據劉老闆所講，永和現址第二日都會繼續做酒樓，但係就要裝修過，佢自己第日都好樂意返去做茶客，同街坊再聚，但係相信到時價錢就好難好似以前咁平喇。